नियामकको कमजोरीका कारण नेपालमा कर्पोरेट फ्रड निम्तिएको सरोकारवालाहरुले बताएका छन् । शनिबार काठमाडौँ युनिभर्सिटी स्कुल अफ मेनेजमेन्ट (कुसुम) र एसीसीएको संयुक्त आयोजनामा सम्पन्न ’कर्पोरेट फ्रड’ मा प्रोफेसनल इथिक्स र गभर्नेन्सको भूमिका’ विषयक गोष्ठीका वक्ताहरुले नेपालमा कर्पोरेट फ्रड निम्तिनुमा विभिन्न नियमनकारी निकायको समेत कमजोरी रहेको स्वीकार गरेका हुन् ।
उक्त कार्यक्रममा आफ्नो धारणा प्रस्तुत गर्दै कर्पोरेट फ्रडका अन्तराष्ट्रिय बिज्ञ एन श्रीनिभासनले विभिन्न मुलुकमा भएका कर्पोरेट फ्रडका बारेमा प्रकाश पारेका थिए भने अख्तियार दुरुपयोग अनुसन्धान आयोगका पूर्व आयुक्त सुर्यनाथ उपाध्यायले बिगतमा हुने गरेका कर्पोरेट फ्रड र आजकल हुने गरेका कर्पोरेट फ्रडका बारेमा प्रकाश पारेका थिए । यस्तै नेपाल राष्ट्र बैंकका पूर्व गभर्नर युवराज खतिवडाले कर्पोरेट फ्रडमा नियमनकारी निकायको भूमिकाका बारेमा समेत प्रकाश पारेका थिए । साथै उनले देशमा विभिन्न खाले नियमनकारी निकाय भएकाले एउटा नियमनकारी निकायले अर्को नियमनकारी निकायलाई साथ र सहयोग गर्नुपर्नेमा जोड दिएका थिए ।
कार्यक्रममा बैंक अफ काठमाडौँका प्रमुख कार्यकारी अधिकृत शोभन देव पन्तले पछिल्लो समय भएका विभिन्न कर्पोरेट फ्रडका बारेमा प्रकाश पारेका थिए भने जगदीश भट्टराइले कर्पोरेट फ्रडमा लेखापालको भूमिकाका बारेमा प्रकाश पारेका थिए । करिव २०० बढीको सहभागीता राखेको उक्त कार्यक्रममा एसीसीएका लागि नेपाल प्रमुख रविन कटवालले दर्शकदीर्घाबाट आएका विभिन्न प्रश्नहरुलाई संयोजन गर्ने काम गरेका थिए ।
कार्यक्रममा उपस्थितहरुले विभिन्न संस्थाले बनाउने दुइखाले वित्तीय प्रतिवेदन, कर्पोरेट फ्रडमा, अख्तियार दुरुपयोग अनुसन्धान आयोग, आन्तरिक राजश्व विभाग, र नेपाल राष्ट्र बैंकको भूमिकाका बारेमा सोधेका थिए ।
