उत्पादनशील क्षेत्रतर्पm लगानी तथा निर्यात विस्तारमा समेत सहयोग पुर्याउने उद्देश्यले नेपाल राष्ट्र बैंकले सहुलियत दरमा प्रदान गर्दै आएको पुनर्कर्जाको उपयोग बढ्दै गएको पाइएको छ । नेपाल राष्ट्र बैंकका अनुसार गत आर्थिक वर्षको ११ महिनामा ७ अर्ब ५२ करोड रुपैयाँ पुनरकर्जाको उपयोग भएको छ । जसमध्ये, ६ अर्ब २२ करोड रुपैयाँ साधारण पुनरकर्जा प्रयोग भएको भने १ अर्ब ३० करोड रुपैयाँ निर्यात पुनरकर्जा उपयोग भएको बताइएको छ । अघिल्लो वर्षको सोही अवधिमा साधारणतर्फ ४ अर्ब ७५ करोड रुपैयाँ र निर्याततर्फ २ अर्ब ६९ करोड रुपैयाँ गरी कुल ७ अर्ब ४४ करोड रुपैयाँ पुनरकर्जा उपयोग भएको थियो ।
त्यसैगरी, भूकम्प पीडितहरूलाई राहत प्रदान गर्न यस बैंकबाट शून्य ब्याजदरमा पुनरकर्जा सुविधा उपलब्ध गराउने व्यवस्था अन्तर्गत २०७३ जेठ मसान्तसम्म २ करोड १५ लाख रुपैयाँ कर्जा प्रवाह भएको छ । राष्ट्र बैंकले जनाएअनुसार, वाणिज्य बैंकहरूले उत्पादनशील क्षेत्रमा कुल कर्जाको अनुपात १६.८३ प्रतिशत पुगेको छ । राष्ट्र बैंकले यस्तो क्षेत्रमा २० प्रतिशत कर्जा प्रदान गर्नुपर्ने नीतिगत व्यवस्था गरेकोमा सो हुन नसकेको हो । २०७२ चैत मसान्तसम्ममा बैंक तथा वित्तीय संस्थाहरूले कुल कर्जाको ५.५३ प्रतिशत कर्जा विपन्न वर्गमा प्रवाह गरेका छन् । अघिल्लो वर्षको सोही अवधिमा यस्तो कर्जाको अनुपात ५.०८ प्रतिशत थियो । तोकिएका कृषि व्यवसायको लागि बैंक तथा वित्तीय संस्थाहरूबाट ६ प्रतिशतको सहुलियत ब्याजदरमा कर्जा उपलब्ध गराउने व्यवस्था अन्र्तगत २०७२ चैत मसान्तसम्ममा २३४२ जना किसानहरूलाई १ अर्ब ९९ करोड रुपैयाँ कर्जा प्रवाह भएको छ । यस व्यवस्था अन्तर्गत बैंक तथा वित्तीय संस्थाहरूले ४ करोड १९ लाख रुपैयाँ ब्याज अनुदान प्राप्त गरेका छन् ।